Itorero ry'Abadventiste b'Umunsi wa 7 - SDA Ururembo
8770 Boul. St-Michel
Montreal, QC, H1Z 3G1
Uwiteka yadukoreye ibikomeye natwe turishimye

Ururembo/Accueil
Turi bande? Nous sommes
Tugereho/Nous joindre
Amakuru/Nouvelles
Tuganire/Forum
Tubwire/Vos commentaires
Amasengesho/Vos prières
Twige Bibiliya/Bible
Prédicateurs/Chorales
Igitabo abashyitsi/Livre d'or
Izindi web site/Liens utiles
Podcast
Video

URUREMBO > Izindi web site >
.
Icyigisho cya 10 - KURIMBUKA KWA YERUSALEMU
.

ICYIGISHO CYA 10
 
28 UGUSHYINGO- 4 UKUBOZA, 2015
 
 
KURIMBUKA KWA YERUSALEMU
 
 
KU ISABATO NIMUGOROBA, 28 UGUSHYINGO
 
AHO ICYIGISHO CY'KI CYUMWERU  GISHINGIYE:  Ezekiyeli 8, Abaroma 1: 22-25, Yeremiya 37: 1-10, 38: 1-6, Yeremiya 29: 1-14,  Daniyeli 9: 2.
 
ICYO KWIBUKWA:Nimuharanire amahoro y'umugi nemeye  ko mujyanwa mo iminyago.  Muzantakambire musabira  amahoro y'uyu mugi, kuko amahoro yawo ari yo yanyu”B.I.I ( Yeremiya 29: 7).
 
            “Mu gihe cy'imyaka mike gusa umwami w’i Babuloni yakoreshejwe  nk’igikoresho cy'uburakari bw'Imana ku Bayahudi banze kwihana. Incuro nyinshi, Yerusalemu yari igiye kugotwa kandi ikinjirwa n'ingabo za Nebukadinezeri.  Amatsinda y'abantu akurikiranye (hagombaga kubanza  abantu bake gusa, ariko  nyuma yaho  hagatwarwa ibihumbi byinshi) yagombaga  kujyanwa ari imbohe mu gihugu cya Shinari; bakajya kuhaba ari inkoreragahato.
 
            Yehoyakimu, Yehoyakini na Zedekiya, abo bami bose b'Abayahudi bagombaga gutegekera munsi y'ububasha bw'Umwami wa Babuloni, kandi bose bari kuzigomeka. Ibihano bikomeye ndetse birushijeho gukomera byagombaga guhabwa ishyanga ryigometse kugeza ubwo nibura igihugu cyose cyari guhinduka umusaka kandi  Yerusalemu igatwikwa, urusengero Salomo yari yarubatse rugasenywa, ndetse  Ubwami bw'i Buyuda bugahanguka  ubutazongera gusubira ku ntebe  bwahozeho mu mahanga yo ku si. - Ellen G.White,  Prophets and Kings, 422,423. (Abahanuzi n’Abami)
 
             Nk'uko twabibonye, kandi nk'uko tuzakomeza kubibona,  nta na kimwe muri ibi cyabagezeho  hatabayeho imiburo itagira uko ingana no kwinginga kw'abahanuzi, ariko by’umwihariko Yeremiya.  Kwanga kumvira  kwabo  nta kindi  kwabazaniye uretse kurimbuka gusa. Iyaba twemeraga kwigira  ku makosa yabo!
 
                           
                                 KU WA MBERE, 29 UGUSHYINGO
 
                                             KURIRIRA  TAMUZI
 
           
             Nubwo ibihe runaka Yeremiya  abasha kuba yarumvaga ko ari wenyine, nyamara ntiyari wenyine.  Imana yari yarahagurukije Ezekiyeli, umukurambere wo mu banyagano bari i Babuloni, kugira ngo akomeze  aburire abanyagano  kandi  ashimangire icyo Uwiteka yari yaravugiye mu kanwa ka Yeremiya muri iyo minsi myinshi yose  no mu myaka iruhije.  Mu murimo we, Ezekiyeli  yagombaga  kuburira  abanyagano iby’ubupfapfa bwo  kwizera  ubuhanuzi bw'ibinyoma bw'ababahanuriraga  ko  bazatahuka  vuba bava  i Babuloni. Kandi na none yagombaga kubahanurira akoresheje ibimenyetso n'ubutumwa  binyuranye,  akaga kagombaga kugwirira  Yerusalemu kubera ko  abantu banze kwihana ngo bave mu byaha n'ubuyobe  bwabo.
 
            Soma amagambo ari mu gitabo cya Ezekiyeli 8.  Uwo muhanuzi  yeretswe iki? Mbese ibyo bitubwira iki  ku birebana n’uburyo  umuco uriho ushobora kumera,  n’uburyo ushobora kugira uruhare ndetse no ku bintu byejejwe? Mbese aha hari iyihe miburo itureba natwe? 
 
              Nubwo incuro nyinshi, inyandiko za Mosa n’iz'abahanuzi zaburiye abantu kureka  gusenga ibigirwamana  no kuramya  izindi mana. Iyi mirongo yerekana  ko iki ari cyo cyariho gikorwa,  ndetse no mu bikoresho  byejejwe  by'ahakikije urusengero.      “Kuririra Tamuzi” wari umugenzo wo kurira  mu buryo bwo gusenga ikigirwamana cy'Abanyamesopotamiya. Nta gitangaje kuba mu gitabo cya 2 cy' Ibyo ku Ngoma  havuga hati: “Kandi  abatambyi bakuru bose  n'abantu  baracumuraga cyane, bagakurikiza  ibizira byose bikorwa n'abanyamahanga; bakanduza inzu y'Uwiteka yari yereje  i Yerusalemu.” ( 2 Ngoma 36: 14).
 
            Ongera usome amagambo ari mu Ezekiyeli  8: 12 witonze.  Ubusobanuro bw'ibyumba  “by' imitekerereze yabo bwite” ntifututse neza. Byagombaga  gusobanurwa ngo ibyumba babikamo ibigirwamana byabo, cyangwa byagombaga gusobanurwa, ibyumba by'imitekerereze yabo bwite, (by'imitima yabo bwite).   Uko byasobanurwa kose, ni uko  abakuru b'abatambyi ari bo bayobozi,  bari baragiye  kure y'Imana  cyane ku buryo bavugaga  ko Uwiteka atarebaga  ibyo bakora, kandi ko Uwiteka  yabaretse.  Hari n'ubundi buryo bwo kubivuga, “Uwiteka  ntacyitaye kuri ibi bintu,  ntabwo ari ingirakamaro.”  Hano,  mu bikoresho byejejwe by'ahazengurutse urusengero rw' Imana,  abo bantu  bishoye mu  gusenga ibigirwamana mu buryo  buteye ishozi,  kandi bakora  ikintu cyose bari barabujijwe  n'amagambo y'Imana.  Ndetse  igikabije cyane,  mu bwenge bwabo bwite bashyigikiraga ibikorwa byabo. Aha na none tuhabona icyo Pawulo yasobanuraga  mu gihe yavugaga iby’abasenga ibyaremwe aho gusenga Umuremyi.  ( soma Abanyaroma 1: 22- 25).
 
                                    
KU WA KABIRI,  30 UGUSHYINGO
 
                            INGOMA IDASHIMISHIJE  Y’UMWAMI SEDEKIYA
 
            Izina Sedekiya risobanuye “Intungane ya Yehova.”  Uyu mwami ni we waherutse ingoma z'ubwami bw'Ubuyuda mbere y'uko burimburwa n'Abanyababuloni mu mwaka wa 586 M.K. (mbere ya Kristo). Agitangira, yagaragaraga nk'ushaka  kumvira amagambo y'umuhanuzi Yeremiya maze akayoboka Abanyababuloni. Nyamara, iyo myifatire y'umwami ntiyarambye.
 
            Soma mu gitabo cya Yeremiya 37:1-10.  Mbese ni uwuhe muburo umuhanuzi Yeremiya yagejeje  ku Mwami Sedekiya?
 
              Kubera igitutu cy'ibyegera bye, cyane cyane ibikomangoma, Sedekiya yasuzuguye imiburo ya Yeremiya ahubwo agirana  amasezerano mu bya gisirikare n'Abanyamisiri, yiringira  ko bazakoma imbere igitero cy'Abanyababuloni. (soma Ezekiyeli 17: 15-18.) Nk'uko yari yaraburiwe mu buryo bukomeye, n’ubundi agakiza ntikagombaga guturuka  mu Banyamisiri.
 
            Soma amagambo ari muri Yeremiya 38: 1-6.  Ni iki cyongeye kuba  kuri Yeremiya bitewe no kubwira abantu  ijambo ry'Imana?
 
  
             Nk'uko Yesu yabivuze: “Umuhanuzi ntabura icyubahiro, keretse  mu gihugu cy'iwabo, no mu muryango w'iwabo no mu nzu yabo.”(Mariko 6: 4). Nyagucwa Yeremiya  yongeye guhura n'umujinya bw'abanyagihugu bene wabo bwite.  Kimwe na bene wabo bose, ntiyagombaga kuvuga ko atari yaraburiwe.  Ariko aha ho, uwo muburo wari uw’ibigeragezo  yagombaga  gusakirana nabyo aramutse akomeje kutanamuka, ari nabyo yakoze!
 
             Mbega ukuntu ibintu bigomba kuba byari bikomereye Yeremiya kubera ko  yaregwaga  guca abantu intege!  N’ubundi, igihe cyose  abantu  baterwaga n'umwanzi   uturutse hanze,  bashakaga kumurwanya. Yeremiya  we yazengurukaga hirya no hino,  imyaka n'indi   abahanurira  ko barushywa n'ubusa ko  urugamba bariho  barwana batazarutsinda, ndetse  ko n'Imana itari kumwe nabo. Birumvikana ko nawe washoboraga gushaka uko  umucecekesha. Kubera ko binangiriye  mu cyaha,  ntibumviye ijwi ry'Uwiteka ryavuganaga nabo, ahubwo batekereje ko ryari ijwi ry'umwanzi.
 
             Nyamara nubwo iryo riba ryari ribi cyane kubera isayo,  tekereza uburyo byari birushijeho gukomerera Yeremiya  kumva ikirego bamuregaga ko ari we udashakira  ubwoko bwe  amahoro, ko ahubwo abashakira amakuba.  Bisa bite  kuregwa  ko  ari wowe wifuriza  umuntu ikibi   kandi ari we  ugerageza gufasha?
 
 
 
KU WA GATATU, 1 UKUBOZA 2015
 
                                 GUTSINDWA KWA YERUSALEMU
 
             Kugotwa kwa Yerusalemu kwatangiye  mu ntangiriro z'ukwezi kwa  Mutarama, mu mwaka wa 588 M.K (Mbere ya Kristo),   birakomeza bigera mu iherezo  ry'impeshyi yo mu mwaka wa 586 M.K. Yerusalemu yari yarabashije  kwihagararaho  mu  gihe cy'imyaka  irenga ibiri  mbere y'uko amagambo y'ubuhanuzi bwa Yeremiya asohora,   ingabo z'Abanyababuloni zikinjirira mu cyuho bari baracukuye mu rukuta basenya umugi. Imbere  mu  murwa  inzara yacaga ibintu ku buryo abarinzi  babuze imbaraga zose  ntibaba bagishoboye  kwihagararaho. Umwami Sedekiya yahunganye n'umuryango we ariko  biba iby'ubusa. Umwami Sedekiya yarafashwe bamushyira Nebukadinezari,  wamwiciye abahungu  mu maso.  Dushobora gusoma byinshi by'iyi nkuru ibabaje  muri Yeremiya 39: 1-10.
 
             Soma amagambo ari muri Yeremiya 40: 1-6. Mbese amagambo    Nebuzaradani  yabwiye umuhanuzi  Yeremiya afite akahe gaciro?
 
 
            Mbega uburyo bitangaje kubona uwo muyobozi w'ingabo w'umupagani asobanukirwa  ikibazo cya Yeremiya cyane kurusha bene wabo! (Abisiraheli). Ni ibyo ukuri ko Abanyababuloni  bagize icyo bamenya kuri Yeremiya  no ku murimo we,  kandi   ko bamufashe mu buryo butandukanye  n'ubwo  bafashemo abandi,  nka Sedekiya  (soma amagambo ari muri Yeremiya 39: 11, 12). Ni mpamvu ki uyu muyobozi w'umupagani yafashe kurimbuka kwa Yerusalemu  nk'aho ari igihano  cy'ibyaha by' abantu  aho kuvuga  ko imana z'iwabo  zirusha  iz'Abayahudi gukomera. Iri somo ntacyo ribivugaho. Impamvu iyo ari yo yose,  ni intangiriro y'ubuhamya bw'uburyo bw’uko no mu makuba nk'ayo atari ngombwa,  hari icyo Uwiteka yari yarahishuriye  abapagani kuri Yeremiya.
 
            Ni ukuhe guhitamo Yeremiya yagombaga kugira: Kujyanwa n'abajyanyweho iminyago i Babuloni,  cyangwa kugumana n'abasigaye mu gihugu?  Nta na kimwe muri ibyo cyari gishimishije, ukurikije ibibazo byose barimo.  Ni ukuri ko ibya mwuka by'ayo matsinda yombi byagombaga kuba bikomeye  kandi Yeremiya we  yagombaga  gukora umurimo wo  kubwiriza aho yari kujyanwa hose. Yeremiya yafashe icyemezo cyo kugumana n'iryo tsinda rya rubanda ryari  risigaye mu gihugu, hamwe n'abantu b'abakene   bari bakeneye  ubufasha no  guhumurizwa.   (Soma amagambo ari muri   Yeremiya 40: 6,7).
 
            Mbese  ni mu buhe buryo ushobora kwiga kubwiriza  abandi, utitaye ku kibazo waba urimo? Kuki ari ingirakamaro kubwawe  kubwiriza mu buryo bwose ushoboye ?
 
         
                                   KU WA KANE, 2 UKUBOZA
 
                                  UMUTIMA WANYU  WOSE
 
            “Muzanshaka  mumbone, nimunshakana umutima wanyu wose ” ( Yeremiya 29: 13). Ubuhamya bwawe  kuri iri sezerano ni ubuhe?  Ijambo “umutima wanyu  wose” risobanuye iki ?
 
              Umwami Imana  amenyera iherezo mu intangiriro. Ndetse no mu gihe abantu b'i Yerusalemu bari bakirwanya Abanyababuloni,  bari bacyiringira ko amagambo y'abahanuzi b'ibinyoma yari akiri ukuri.  Uwiteka Imana yarimo akoresha Yeremiya kugira ngo abwire ab’ahazaza, abwire abantu bari bamaze kugera i Babuloni, n'abari kuzahagera nyuma.  Mbega amagambo yababwiye!
 
             Soma amagambo ari muri Yeremiya 29:1-14. Ni ubuhe buryo urukundo n'impuhwe by'Imana byahishuriwe muri aya masomo?
 
  
            Muri iri somo, harimo ubutumwa bw' ubuntu bw'ukuri, binyuranye n'ubutumwa “bw'ubuntu” bw'ibinyoma ubwo abantu bari barumvanye abahanuzi bababwira ko  bazamara imyaka mike mu bunyage, ndetse ko itari kurenga ibiri gusa. Uwo si wo wari umugambi w'Imana, kandi ibyo ntibyari bigiye kubaho.  Ahubwo, bishingiye ku nyigisho zisobanutse  za Mose,  bagombaga kwemera ko ibi byababayeho ari byo bihitiyemo, ariko nk'uko Mose yari yarababwiye, iyo baza kwihana, bagombaga gusubizwa mu gihugu cyabo.
 
            Soma amagambo ari mu Gutegeka kwa Kabiri 30: 1-4. Ni ubuhe buryo aya masomo agaragaza icyo Yeremiya  yabwiye abantu?  ( Soma no mu  Gutegeka 4: 29.)
 
 
 
 
 
             Twahawe impano y'ubuhanuzi mu butumwa bw'agahebuzo bwa Ellen G. White. Ni ubuhe buryo dushobora kwizera ko muri iki gihe tutamwereka imyitwarire nk'iyo abenshi ( ariko si bose ) berekaga  Yeremiya?  
 
 
                                      KU WA GATANU, 3 UKUBOZA
 
                                      IMYAKA MIRONGO IRINDWI 
 
             Ubuhanuzi bwa Yeremiya bugomba kuba bwaribajijweho ibintu bibiri mu mitekerereze y' abajyanweho iminyago: Ku ruhande rumwe, ntibagombaga kwemera icyo abahanuzi b'ibinyoma bababwiraga. Ku rundi ruhande ntibagombaga gucibwa intege. Yasabye abanyage benewabo gusabira i Babuloni. Icyo cyifuzo kibasha kuba cyaratunguye abajyanwe ho iminyago. Icyo Yeremiya yasabaga abanyage nticyari cyarigeze kibaho  mu mateka ya mbere ya Isirayeli. Gusabira umwanzi  wakoze nk'icyo  Abanyababuloni bari barabakoreye kandi ari ubwoko  bwatoranijwe n'Imana, ibyo  rwose  ntibyari byarigeze bimenywa.  Umuhanuzi yarogoye  imyumvire yabo yose ku birebana n'urusengero na Yerusalemu;  no mu gihugu cy'abapagani bagombaga gusenga,  kandi Imana Ihoraho yagombaga kubumva.
 
             Zirikana na none  icyo Yeremiya avuga muri Yeremiya 29: 7  kuko amahoro “ y' igihugu cyabacumbikiye”, ariyo  mahoro yabo nabo. Nk' abantu b'abanyamahanga n'Abasuhuke muri icyo gihugu, ku buryo bw'umwihariko,  , iyo muri rusange  mu gihugu  ibintu  byagendaga nabi, ni bo byagombaga kugiraho ingaruka. Mu mateka  yose,   twagiye tubona ingero zibabaje  zo kutihanganira ibintu byagiye biba bibi  mu gihe igihugu gihuye n'ibihe biruhije. Abantu bagashakisha gatozi bashobora  kubigerekaho, kandi kenshi babigerekaga  kuri  nyamuke cyangwa ku banyamahanga, kenshi bene abo ni bo  bahitaga bareba.  Ibi ni ukuri nubwo atari byiza.
 
             Ni ibihe byiringiro by'agahebuzo abanyage bahawe biri muri Yeremiya 29: 10?  ( Soma no muri Yeremiya 25: 11, 12; 2 Ibyokungoma 36: 21; Daniyeli 9: 2.)
 
 
 
 
             Ikintu cyose Imana yabaga yaravuze  ko kizaba  cyagombaga kuba.   Bityo, bari bafite impamvu y'ukuri yo kwiringira ko Imana yagombaga gusohoza ubwo buhanuzi. (Yeremiya 29: 10 ).  Kuki  imyaka mirongo irindwi ari yo yagombaga kuba imyaka ndakuka yo kuba mu bunyage? Nta mpamvu tuzi,  nubwo  byaba bifitanye isano n'igitekerezo cy'ikiruhuko cy'Isabato cy' icyo gihugu. ( Soma Abalewi 25:4), 26:34, 43 ). Icy’ingenzi cyane ku birebana n'ubu buhanuzi ni uko iyo baramuka babwize kandi bakabwumvira, byagombaga guha abanyage ibyiringiro bikomeye n' icyizere  cy'uko Imana ifite ubutware budashidikanywaho. Utitaye ku bigaragara, utitaye ku makuba yabagwiririye, bagombaga kumenya ko nta rirarenga, kandi ko Imana itabaretse. Bari  bakiri ubwoko bwahawe isezerano, kandi Imana ntiyari yarabaretse cyangwa ngo ireke  ubwoko bw'Isiraheli.  Gucungurwa  kwari ukw’abantu bose biteguye  kuzuza ibisabwa.
 
            Ubuhanuzi buguha ibyiringiro bikomeye by'ahazaza ni ubuhe?  Ubukomeza kwizera kwawe ni ubuhe kandi bugufasha bute kwiga kwiringira Uwiteka ku cyakubaho icyo ari cyo cyose?  
 
 
                                  KU WA GATANDATU, 4 UKUBOZA
 
 
IBINDI BYO KWIGWA NO KUZIRIKANWA: “Dukomeje kuba mu ngorane zo kwishyira hejuru yo kwiyoroshya k'ubutumwa bwiza.  Hari icyifuzo gikomeye  ku bantu benshi cyo gutunguza isi ikintu kidasanzwe,   kizashyira abantu  mu munezero mwinshi wo mu buryo bw'umwuka no guhindura uburyo bw'imibereho yo muri iki gihe; kuko guhabwa agaciro k'ukuri muri iki gihe, ntabwo ukuri nk'uko ari ko kwari gukwiriye kumera, ahubwo guhinduka dukeneye  ni uguhinduka k'umutima, kandi gushobora gusa kubonwa no gushaka umugisha w'Imana  buri muntu ku  giti cye  no kumwingingira kumuha imbaraga  ye, no gusengera kugira ngo tubabarirwe by'ukuri kandi no kugira ngo kamere yacu ishobore guhindurwa. Uko ni ko guhinduka  dukeneye  ubungubu kugira  ngo tugire iyi mibereho, dukwiriye kwitoza kwihangana no kwerekana umutima ufite ishyaka. Mu kuri kose dukwiriye kwibaza tuti” Nkore nte kugira ngo ndagwe ubugingo buhoraho?” Dukwiriye kumenya intambwe dutera tugana mu ijuru.” - Ellen G.White, Selected messages, book one, pp. 187, 188. (Ubutumwa Bwatoranyijwe, Igitabo cya 1)
 
IBIBAZO BYO KUGANIRWAHO:    
 
  1. Nk'uko twabibonye, Yeremiya yabwiye abantu “gushaka Uhoraho.”  Ni mu buhe buryo dushakamo Uhoraho? Haramutse hagize umuntu ukubaza ati, “ Ubwanjye nshaka kumenya Imana:  Ni mu buhe buryo nayibona?” wamusubiza ute?
 
  1. Ibande cyane kuri iki gitekerezo cy'uburyo, mu mateka abahanuzi bagiye basuzugurwa kandi bakagirirwa nabi mu gihe cyabo. Ni iki bigomba kandi bishobora kutwigisha ku birebana n'uburyo dufata ubutumwa bwa  Ellen G.White? Tekereza ibye  wifashishije icyo Yesu yavuze hano: “Mwebwe banditsi b'amategeko n'Abafarisayo, mwa ndyarya mwe!  Muzabona ishyano: Kuko mwubaka ibituro by'abahanuzi, mukarimbisha inzibutso z'abakiranutsi, mukavuga muti, “Iyaba twariho mu gihe cya basogokuruza, ntituba twarafatanije nabo kuvusha amaraso y'Abahanuzi.  Uko ni ko mwihamya ko muri abana b'abishe abahanuzi ” ( Matayo 23: 29-31).     
                   
  1. Ibande  cyane ku kibazo giheruka cy'icyigisho cyo ku wa gatanu.  Mu bihe byashize, ubuhanuzi bwinshi bwagiye busohora, kandi nk'uko  tubibona muri iki gihe, dushobora kubona ko bwasohoye. Ni ubuhe buryo uko gusohora k'ubuhanuzi kudufasha  kwiringira ko n'ubutarasohora nabwo buzasohora?
 
                                                        *********** 
                              
 
ISABATO YA 49
 
GAHUNDA YO KUGARURA ICYACUMI NO GUTURA AMATURO
 
KU WA 5 UKUBOZA, 2015
 
 Kuri uyu munsi, tariki ya 5 Ukuboza 1901,  Ellen White yanditse amagambo akurikira mu kinyamakuru cyitwa Youth 's Instructor (Umwigisha w'urubyiruko): “Rubyiruko ncuti zanjye nkunda,  mujye mwibuka ko buri munsi, buri saha, buri gihe,  muba mwidodera umwenda  w'iherezo ryanyu. Buri gihe, urudodo ruba  rwiteguye  kwinjira mu ntoboro y'igipesi, ari yo ishobora kwangiza umwenda ntugaragare neza.
 
 Niba uri umunebwe cyangwa utagira icyo witaho, uzonona imibereho yawe   wateguriwe ko igomba kukubera myiza cyane kandi  ikagutunganira.  Niba uhitamo  gukurikiza ibyo kamere yawe yishakiye, ukagira ingeso zitari iza Gikristo, zizakubata, ziguhambire nk'uko ibyuma bihambirirwa hamwe.   Kandi  mu gihe ushaka kugenda uko wishakiye ntugendane na Kristo icyitegererezo cyawe,  bizagusha benshi   kubera gukora ibibi kwawe, kandi ntibazigera na rimwe bishimira ibyiza Ijuru ryabateganirije.  Nyamara, n'ushyiraho umwete mu gutsinda kwikanyiza,  ntushake kwibuza  amahirwe  yo gufasha abakuzengurutse, umucyo w'icyitegererezo cyawe uzayobora abandi ku musaraba”  ( E.G. White, Youth 's Instructor, ( Umwigisha w'Urubyiruko),  Ukuboza 5, 1901).
 
ICYO DUHAMAGARIRWA: Muri uku kwezi k'Ukuboza, mureke twe kwibuza amahirwe yo gutanga, mureke tugire imibereho irangwa n'ubuntu kuko ari yo ibasha kuyobora abandi kuri Kristo. 
 
DUSENGE:
 
                                                      **********